اشترك مجانا بقناة الديار على يوتيوب

نشرت المخرجة ريما عاصي الرحباني, اليوم الاربعاء, صورةً جديدةً على حسابها عبر "فيسبوك"، ظهر فيها وبشكل واضح كلّ من السيّدة فيروز، ابنها هلي وابنها الموسيقار زياد الرحباني.

وتفاجئ الجمهور بأن أحد نجليها يعاني من وضع صحي خاص. 

وذكر أن هذه هي المرة الأولى التي يجتمع فيها كل من زياد الرحباني وشقيقته ريما بعد خلاف دام لفترة طويلة.

وكان قد نقل زياد عن صفحة شقيقته منشورا كانت قد كتبته يكشف عن حديث خاص جرى بين الشقيقين حيث  طرحت ريما بعض الأسئلة الوجودية التي لم تجد لها أجوبة من قبل وعلى ما يبدو كان زياد يملك الجواب.

وأرفقت ريما الرحباني الصورة بمنشورٍ، كتبت فيه:

"فيروز (إمّي) زياد (أخوي) وهلي الرحباني (أخوي), الثلثاء 21 حزيران 2022 في تمام الساعة 8 و21 دقيقة, كنيسة السيّدة - المحيدثة - بكفيا كنيسة العاصي, القداس السنوي عن راحة نفس عاصي (أبوي) وليال الرحباني (إختي), مع الصديق الأبونا ملحم, بـ آيفون ريما طبعاً".

وأضافت, "مش من زمان كتير فهمت إشيا كتيرة, أسئلة كتير كنت إطرحها بيني وبين حالي، إطرحها على خوارنة ومطارين, ع فلاسفة ومؤمنين, فتش عنها بالكتب والأناجيل, وولا مرّة حدا بجوابو ريّحني او قنعني!".

وتابعت, "ليه هلي خلق بهالعيلة؟ وليه صار معو هيك؟ ليه عاصي فل بكير؟ وليال فلّت أبكر من بكير!... وليه؟ وليه؟ ولَيْهات كتيرة ضل إسألها.. ونفسي ما ترتاح من الوَجع ومن الأسئلة! إسمع كلام كتير ما يعنيلي شي ما يحرّك فيّي شي! "ضريبة الشهرة", "مقابل كل فرح في وجع!", "مقابل كل نجاح في بِكي", وما كانت تِرضى نفسي ولا تِستَكين".

واستكملت, "ربنا شو؟ بيَعطي وبياخد؟ ربنا ليه راضي بهالظلم كلّو على هالارض الواسعة؟ ليه ما وزّع كَرمو على كل الناس بالعَدل والتَساوي؟ ليه؟ ليه؟ اي اي ما بنكر إنّي مرّات "كتير بكيت وصلّيت انا وحالي ووحدي إحتجّيت!, وزعلت منّو وما عدت احكيه".

وأشارت إلى أنه, "بس مش من زمان لقيت الجواب, هلي بيناتنا نحنا بالذات ت نضَل ماشيين عَ الارض! هلي حمانا من ضو الشهرة والمال والجاه والتكبُّر والتعجرُف وكل ملذّات الحياة الفانية, هلي نقّى نفوسنا وقلوبنا وطهّرها! هلي رد عنّا ضربات الحقد الماكر والحسد والغيرة, هلي خلانا نضل مجموعين وخلّا هالبيت ما يعيش فيه الا الحُب".

وزادت, "خلا قلوبنا توزّع حب وفرح عالناس كل الناس, خلانا مرتبطين بالناس البُسطا اللي بيشبهونا ومنشبهن, مش عن عبث بِكره الحياة الإجتماعية اللي مليانة تصنّع وكذب وسطحية وظهور وحفلات وعهر وكفر وبَطر ونجومية! مش عن عبث ما برتاح إلا مع الناس الطيّبين بالضياع الخجولة, والفلاحين والزرّاعين والحطّابين والعمّال الكادحين".

وقالت ريما: "لاء.. منّي شيوعيّة.. لاء انا مسيحيّة وهيك بتكون المسيحيّة الحقيقيّة! مش اللي مغطسة بتيجان الدهب ولا بالصلبان المشطوبة, ما حدا علّمني ما حدا ربّاني ما حدا لزَمني.. كون هيك! هلي اللي ما بيِحكي وما بيِسمع وما بيِمشي, هوّي اللي علّمني كل هول علّمني سامح وحب, وأعطي أهلي عمري وحياتي متلما هوّي عطانا, وبحسب قناعة عاصي وكلام عاصي إلي".

وختمت المخرجة ريما الرحباني بالقول: "هلي وزّع ذكاه عليكي إنتي وزياد وليال بالتساوي! ولهيك لازم كتير تحبّوه لهلي!", اي يا بيّي هيّاني عم قول اللي بدَّك ياني، إنتَ وساكٍن العالي، قولو, هلي يا ملاك البيت الله يحرسك ويطوّل عمرك ويخلّيك بركة هالبيت!". 


الأكثر قراءة

ميقاتي الى حكومة «رئاسيّة» جامعة.. و «الوطني الحرّ» و «القوات» سيُشاركان فيها الدولة تتحلّل والمواطن يُعاني.. والصراع على الحصص الحكوميّة مُستمرّ إتجاه لمُوظفي «المركزي» الى الإضراب المفتوح.. وخطر على معاشات القطاع العام