اتحاد التزلج والبياتلون كرّم ابطاله خلال حفل حاشد... فريدي كيروز: موسم 2026 كان ناجحاً بامتياز ودعمنا رئيس الاتحاد الدولي ألكسندر اوسبلت

اشترك مجانا بقناة الديار على يوتيوب

وزّع الاتحاد اللبناني للتزلج على الثلج والبياتلون الكؤوس والجوائز على ابطال وبطلات موسم 2025-2026 خلال حفل حاشد أقامه في كازينو لبنان.

تقدّم الحضور العميد الركن سميح خليل قائد مدرسة التزلج في الجيش اللبناني،رئيس الاتحاد فريدي كيروز والأعضاء ،رئيس الإتحاد السابق شربل سلامة،رؤساء محطات التزلج في لبنان ،رؤساء أندية التزلج ،ممثلي الشركات الراعية ،المدربين ،الابطال والبطلات وأهاليهم.

النشيد الوطني افتتاحاً ثم دعا عرّيف الحفل الاعلامي خالد مجاعص الحضور الى الوقوف دقيقة صمت حداداً على شهداء انفجار مرفأ بيروت الذي حصل في 4 آب عام 2020.

مجاعص

ثم القى مجاعص الكلمة التالية :

باسم الرئيس الخلوق فريدي كيروز وأعضاء اتحاد التزلج والبياتلون برحّب فيكن بحفل توزيع الكؤوس والجوائز على ابطال وبطلات موسم ٢٠٢٦ وهوي الحفل السنوي التقليدي يللي بيجمع عيلة لعبة التزلج بأجواء اخوية وعائلية .

الحدث الابرز بشتاء الـ ٢٠٢٦ كان الاولمبياد الشتوي بكورتينا- ميلانو وكان لبنان احدى الدول العربية الخمس الممثلين بأبرز حدث رياضي شتوي يجري كل اربع سنوات . اتحاد التزلج و على رغم كل الصعوبات والتحديات حتى بقلب اللجنة الاولمبية وضع كل الظروف المناسبة لمشاركة ممثلي بلاد الارز سامر طوق بسباقات العمق ١٠ كلم و اندريا حايك في سباق التعرج ومانو عويس اللي الاصابة منعتها من المشاركة ضمن البعثة .مع العلم ، انو لبنان كان من اول المشاركين بأول نسخة للاولمبياد الشتوي عام ١٩٤٨ .

فالكل مدرك انو اتحاد التزلج بلبنان من الاتحادات اللي بتنعّد عأصابع اليد الواحدة اللي بتكون فاعلة ونشيطة وعم بتقوم بواجباتها على أكمل وجه من رعاية وتطوير اللعبة وصقل الجيل الناشئ وتنظيم البطولات والمشاركة بالدورات والمسابقات والبطولات الخارجية ببعثات من كافة الفئات العمرية مع مواكبة اعلامية شاملة.

ومن اسباب نجاح هالاتحاد عمل اللجنة الادارية بيد وحدة بهدف رعاية رياضة التزلج وهيي اللعبة الشتوية الوحيدة ضمن الاتحادات الأولمبية االموجودة حالياً بلبنان .

رح كون صريح:لم اسمع ابداً عن خلاف داخلي ضمن اللجنة الادارية. اسمحولي شير انو اتحاد التزلج أبعد كلياً السياسة عنّو وما دخل بالزواريب المناطقية الضيّقة فهوّي صامد وكتلة موحدة .

ولازم عيلة التزلج تفتخر بالاتحاد برئاسة الاستاذ فريدي كيروز عضو الاتحاد الدولي يللي عم بقود اللعبة من تألق لتألق مع التمني الدائم بنجاح الاتحاد محلياً ودولياً ومواصلة رسالتو الرياضية.

كيروز

وجرى عرض فيديو يوثّق نشاط الاتحاد ليلقي رئيس الاتحاد فريدي كيروز الكلمة التالية:

مسا الخير للجميع وأهلا وسهلا فيكن بالحفل السنوي لتوزيع جوائز بطولة لبنان بالتزلج لموسم 2025-2026.

ما فينا نبلش الحفل اليوم من دون ما نتذكر تاريخ 4 أب الذكرى ألأليمة على كل اللبنانيين ونتذكر شهداءنا يلي إستشهدوا بهيدا النهار ونصليلن حتى العدالة تاخد مجراها.

من بعد العرض يلي شفناه عن نشاطات الإتحاد ، خليني بلش بالشكر لكل شخص ساهم بنجاح مسيرة الإتحاد هيدي السنة من لاعبين ، مدربين واندية يلي من خلالن وبمجهودن ومثابرتن عم نقدر نسعى حتى نكون بين الدول الكبيرة والمؤثرة بالاتحادات الدولية يلي مننتمي لها.

موسم 2026 كان ناجح: كمية الثلوج خلتنا نتدرب وننظم سباقاتنا، مشاركتنا الخارجية حققت إنجازات، عدد اللاعبين الجدد عم بزيد بكل الالعاب،المدربين عم بتابعوا دورات تدريبية، الأندية مصممة على المنافسة و ثقة الاتحادات الدولية عم تكبر فينا.

صحيح انه هيدي السنة كان في ضرر من الحرب يلي صارت بأول اذار ويلي كان تأثيرها على الرياضة اللبنانية بسبب تجميد كل النشاطات بقرار من وزارة الشباب والرياضة ، نحنا كإتحاد ألغينا بطولة لبنان بالبياتلون والمونتنييرنغ ولكن هيدا الشي ما منعنا انه نحاول نعوّض الفرق من خلال إستكمال تواصلنا مع الاتحادات الدولية حتى تكون صورة لبنان فعالة. لهيدا الشي نحنا مصرين لإستضافة الاتحاد الدولي للمونتنيرنغ لتنظيم المؤتمر الدولي بلبنان بال 2027 بمشاركة رؤساء اتحادات اكتر من 60 دولة .

كما تم الموافقة على طلبنا لإستضافة بطولة اسيا للكبار سنة 2028 ويلي رح يتم تنظيما بالمزار كفردبيان و هيدي السنة رح نبني حقل رماية للبياتلون بمنطقة الارز حتى نبلش نستقبل بطولات دولية.

على الصعيد الدولي،تم انتخاب رئيس جديد للاتحاد الدولي للتزلج وهو الصديق الكسندر اوسبلت Alexander Ospelt)) ،والذي رشّحه الاتحاد اللبناني ودعمه الى أقصى الحدود وحضرتُ الجمعية العمومية الانتخابية ، من ليشتنشتاين يلي كان لبنان الداعم الاول لوصولو لهيدا المركز لا بل هو المرشح يلي لبنان اقترحوا وتبنتوا اكثرية الدول الفعالة.

هيدا الشي رح يساعدنا كتير بالفترة المقبلة من خلال زيادة البرامج التطويرية للاعبين والمدربين.

كمان دوليا" ما فينا نكون بحفل تكريم اللاعبين ما نذكر ونشدد على الانجازات يلي تحققت من بعض الاعبين بالبطولات الخارجية وبمجهود فردي وهي:

- اللاعب سامر طوق قدر يتصنّف للألعاب الاولمبية بالكروس كاونتري من خلال مشاركته بكأس العالم بالنروج وتحقيقه علامات مشرفة.

- سيرال لظم وبول كيروز تحقيقن 4 ميداليات ببطولة البلقان برومانيا والبوسنة بالبياتلون

- إلسا قهوجي حققت ميدالية برونزية ببطولة الاولاد ببرالوب بفرنسا بمشاركة 27 دولة ( وهيدي النتيجة تعتبر انجاز تاريخي لانه لأول مرة لبنان بحقق ميدالية ببطولة مستواها كتير عالي)

فمبروك مرة تانية على هذه الانجازات و مبروك لأنديتكم ومبروك للبنان.

كل هيدا الشغل بيطلب منا كهيئة إدارية ولجان فنية متطوعة مجهود كتير كبير تجاه أنديتنا وتجاه لاعبينا , وهون حابب السنة ضوّي عل نقطة لبعض الأهالي يمكن مش الكل بيعرفها : اعضاء الاتحاد ورؤساء الاندية واللجان الفنية عملن تطوعي لانن بحبوا رياضة التزلج ( ما حدا بياخد معاش ولا حدا عم يعمل هل الشي لانه في استفادة شخصية ) فبتمنى انه يكون تعاملنا مع بعضنا فيه إحترام وتقدير وصداقة.

بخصوص المشاكل الموجودة بالرياضة اللبنانية ويلي لازم نتوقف عندها متل كل سنة،لانه عم بتأثر على اللاعبين وخصوصاً الأولمبيين: اليوم ما بقى فينا نتخبى ورا اصبعنا كل يلي عم بصير هو عمل كيدي ومش منافسة لتحسين الرياضة انما للبقاء بالمراكز وهيدا الشي عم يدفع ثمنوا اللاعبيين.

وانا من موقعي كمسؤول باتحاد التزلج بدي إعتذر من اللاعبين يلي يشاركوا باولمبياد كورتينا (ايطاليا) على التقصير يللي صار بحقن وتركن لوحدن لترتيب امورن ، هيدا الشي كان خارج عن إرادتنا لانه تم تغييب الاتحاد بالكامل.

ومن هون كإتحاد بدنا نكون عم نساهم ولو بشكل بسيط مع اللاعبيين الاولمبيين ورح نعطي اليوم كل لاعب اولمبي مبلغ 3000 دولار اميركي ( سامر طوق و اندريا حايك ومساهمة لمانو عويس).

واخيرا"بدي وجه تحية لكل الأندية وقلكن انه عملكم الدؤوب بمعزل عن كل المشاكل هو دليل ساطع للجميع بأنوا الرياضة الشتوية والألعاب يلي مؤتمنين عليها رح تتخطى جميع المصاعب وتنطلق لمرحلة أفضل.

إن الإتحاد اللبناني للتزلج ومن خلال هيئته الإدارية الحالية وبمساعدة اصحاب محطات التزلج عمل مجهود كبير لرفع مستوى رياضة التزلج في لبنان ونشرها من خلال إقامة الدورات التدريبية للمدربيين ، إقامة العديد من السباقات والوقوف الى جانب اللاعبين قدر المستطاع.

اما انتم يا ابطال لبنان في التزلج على الثلج فالشكر لكم على مجهودكم لتحسين مستوى المنافسة كما الشكر أيضا" لأهاليكم الذين شجعوكم لممارسة رياضة التزلج والشكر لأنديتكم التي إحتضنتكم وأمنت بقدراتكم والكشر موصول لرجال الصحافة والاعلام.

وأخيراً نقول لكم بأن الإتحاد اللبناني للتزلج والبياتلون سيبقى الى جانبكم لتحقيق الميداليات وأفضل النتائج.

وبعد كلمة كيروز، وزّع رئيس واعضاء الاتحاد الدروع التقديرية الى العميد الركن سميح خليل، والى ممثل الصليب الأحمر اللبناني،والى عصام مبارك(ميزون دو سكي)،محطة الأرز(جوني كيروز)،مزاار سكي ريزورت(زينة جورج والى شركة "كومرشل انشورنس".

كما سُلّمت المنح المالية الى اللاعبين سامر طوق وأندريا حايك ومانو عويس.

وفي الختام، جرى تتويج الأبطال والبطلات وسط اجواء احتفالية.