جدّي دياب

اشترك مجانا بقناة الديار على يوتيوب

عبد الله موسى كفوري

ما شفتوا جدي دياب؟

واقف ع بيادر الاحباب

بشروال أسود وكفية

يمّا لابس جلباب

شوارب عامرة ونظرات متل الشهاب 

ما شفتوا جدي دياب؟

لاحق البقرات غدوية 

بقميص قبّة خنق، بزرار ومكوّية 

وع خصرو شادد زنّار لفّات قويّة 

ما شفتو جدّي دياب؟

بايام الثلج والريح 

ملفلف بعبا، ومطرحو مستريح 

عن السطح نازل والهوا تجريح 

ما شفتوا جدي دياب 

ماشي ورا العنزات 

وما شافني قبل م مات 

حكيتلي الصورة حكايات 

ما شفتوا جدي دياب؟

راكب ع حمار عند الغياب

راجع من الغيضة، ومن السباع ما هاب 

بقيت الصورة وهوّي غاب

ما شفتوا جدي دياب؟!